काठमाडौँ–प्रधानमन्त्री शेख हसिनाको नेतृत्वमा रहेको सत्तारूढ बंगलादेशी अवामी लिग (एएल) पार्टीले संसदीय निर्वाचनमा २९८ मध्ये २२३ सिट जितेको छ । 

३०० सिटमध्ये एउटा निर्वाचन क्षेत्रको नतिजा आउन ढिलो भएको र एक निर्वाचन क्षेत्रमा स्वतन्त्र उम्मेदवारको मृत्यु भएपछि मतदान स्थगित गरिएको मुख्य निर्वाचन आयुक्त काजी हबिबुल अवालले बताउनुभयो ।  

बंगलादेशमा कुनै दलले संसद्को कुल १५१ सिट जित्न सके सरकार बनाउन सक्छ । बंगलादेशमा बहुमत प्राप्त गर्ने दलले सरकार बनाउन सक्ने उहाँले बताउनुभयो ।

सत्तारूढ एएल पार्टीका २६० भन्दा बढी उम्मेदवार राष्ट्रिय निर्वाचनमा सहभागी हुनुहुन्थ्यो । स्थानीय समयानुसार आइतबार बिहान ८ बजे सुरु भएको मतदान अपराह्न ४ बजे सकिएको थियो । आइतबार देशभरका ४२ हजारभन्दा बढी मतदान केन्द्रमा मतदान भएको थियो ।–एजेन्सी