काठमाडौं-हुम्ला र बाजुरा जिल्लाको सीमा क्षेत्रमा भएको घटनाको छानबिनका लागि गृह मन्त्रालयले छानबिन टोली गठन गरेको छ। गृह मन्त्रालयका सचिव राजकुमार श्रेष्ठको संयोजकत्वमा रक्षा सचिवसहित सबै सुरक्षा निकायका प्रमुख एवं प्रतिनिधिहरूको आज (आइतबार) सिंहदरबारमा बसेको बैठकले प्रहरी वरिष्ठ उपरीक्षक (एसएसपी) को संयोकजत्वमा छानबिन टोली गठन गरेको हो। 

टोलीलाई तत्कालै कार्यस्थलमा खटि र प्रतिवेदन पेस गर्न निर्देशन दिइएको गृह मन्त्रालयका प्रवक्ता सहसचिव आनन्द काफ्लेले जानकारी दिए। 

उनका अनुसार घटनाको जानकारी प्राप्त हुनासाथ हुम्ला र बाजुरा दुवै जिल्लाबाट नेपाल प्रहरी र सशस्त्र प्रहरी बलको विशेष टोली घटनास्थल परिचालन गरिसकिएको छ। 

‘सीमा क्षेत्रमा नागरिकको सुरक्षा सुनिश्चित गर्न र शान्त्रि सुव्यवस्थालाई थप मजबुत बनाउन मन्त्रालयले जिल्ला सुरक्षा सुरक्षा समितिलाई निरन्तर उच्च सतर्कता अपनाउन र भविष्यमा यस्ता घटना दोहोरिन नदिने गरी सुरक्षा रणनीति अख्तियार गर्न समेत निर्देशन दिइसकिएको छ,’ गृह मन्त्रालयले जारी गरेको प्रेस विज्ञप्तिमा उल्लेख छ। 

घटनाबारे जानकारी प्राप्त हुनासाथ गृह मन्त्रालय सक्रिय भएको उल्लेख गर्दै हुम्ला र बाजुरा दुवै जिल्लामा नेपाल प्रहरी तथा सशस्त्र प्रहरी बल, नेपालका विशेष टोली परिचालन गरिएको विज्ञप्तिमा जनाइएको छ।

सीमा क्षेत्रमा नागरिकको सुरक्षा सुनिश्चित गर्न तथा शान्ति सुव्यवस्था थप मजबुत बनाउन मन्त्रालयले जिल्ला सुरक्षा समितिलाई उच्च सतर्कता अपनाउन निर्देशन दिएको छ। साथै, भविष्यमा यस्ता घटना दोहोरिन नदिन सुरक्षा रणनीति अवलम्बन गर्न पनि भनिएको छ।

मन्त्रालयले नेपाल प्रहरी र सशस्त्र प्रहरी बल नेपाललाई थप आवश्यक सुरक्षाकर्मी परिचालन गर्न निर्देशन दिँदै विवादको स्थायी समाधान र समन्वयका लागि जनप्रतिनिधि तथा सरोकारवाला निकायसँग निरन्तर समन्वयात्मक बैठक गरिरहेको जनाएको छ।

गृह मन्त्रालयले आम नागरिकको जीउधनको सुरक्षा र सीमा क्षेत्रमा शान्ति कायम राख्न सरकार पूर्ण प्रतिबद्ध रहेको उल्लेख गर्दै दुवै जिल्लाका नागरिकलाई संयमता अपनाउन आग्रह गरेको छ।