काठमाडौं- नेकपा एमालेका महासचिव शंकर पोखरेलले पपुलिजमले देशलाई सही दिशा दिन नसक्ने बताएका छन्।
एमाले प्रचार तथा प्रकाशन विभागको पद हस्तान्तरण कार्यक्रमा बोल्दै आज महासचिव पोखरेलले पपुलिजमले क्षणिकमा जनतालाई मन पर्ने कुरा गरेर भ्रममा पार्ने तर त्यसको दीर्घकालिन असर घातक हुने बताए।

महासचिव पोरखेलले जनतालाई लोकरिझाँइका कुरालाई रामवाण जस्तो मानेको बताए । ‘यस्ता कुराले समाजलाई दिग्भ्रमित पारिरहेको छ । यो लामो समय जादैन’ उनले भने।

महासचिव पोखरेलले पार्टी थप एकताबद्ध भएर अघि बढ्ने बताएका छन्। पार्टी शुद्धिकरण,सुदृढिकरण र पुनर्जागरण अभियान मार्फत एमाले थप बलियो हुने स्पष्ट पारे। पार्टी सुदृढिकरणका लागि कार्यदलले काम थालिसकेकोले यसको निष्कर्षको आधारमा पार्टीलाई थप मजबुज बनाइने पोखरेलले बताए।

महासचिव पोखरेलले निर्वाचमा पार्टीको विपक्षमा जनमत आएकोले व्यापक सुधारको आवश्यकता रहेको औल्याएका छन्। ‘एमालेको विपक्षमा जनमत प्रकट भएको छ। यसको कारण हामीले जनतासँगको सम्बन्ध बलियो बनाउन सकेनौ’ पोखरेलले भने ‘तर एमाले अब जनतासँग प्रत्यक्ष जोडिएर अघि बढ्छ।’

कार्यक्रममा प्रचार विभागका पूर्व प्रमुख राजेन्द्र गौतमले वर्तमान प्रमुख निरज आचार्यलाई अघिल्लो कार्यकालको बैठक पुस्तिका हस्तान्तरण गरे । सोही अवशरमा प्रचार विभागका पूर्व प्रमुखहरु सूर्य थापा,मीनबहादुर शाही लगायतको पनि उपस्थिती थियो।