काठमाडौं- हाल देशभर मनसुनी वायूको प्रभाव रहेको छ। हाल मनसुनको न्यून चापीय रेखा सरदर स्थानभन्दा केही माथि रहेको छ।

यसको प्रभावले काठमाडौं लगायत विभिन्न भूभागमा बिहानैदेखि पानी परिरहेको छ।

पछिल्लो एक घन्टामा सिन्धुपाल्चोकको मेलम्चीमा २४.६ मिलिमटर वर्षा मापन भएको छ।

त्यस्तै बर्दियाको कटरनियामा २३.६ मिलिमिटर वर्षा भएको छ।

शुक्रबार बिहान बागमती, गण्डकी र लुम्बिनी प्रदेशमा वर्षा भइरहेको छ।

पछिल्लो चौबीस घन्टामा सिन्धुपाल्चोकको गोब्रेमा १००.८ मिलिमिटर वर्षा भएको छ। नवलपुरमा ९५.८ मिलिमिटर, देउराली नवलपुरमा ७७.६ मिलिमिटर, डाँडामा ९५.८ मिलिमिटर, चितवनको गोविन्दवस्तीमा ७८.८ मिलिमिटर वर्षा भएको छ।

शुक्रबार दिउँसो देशका पहाडी भूभागका धेरै स्थानमा मेघगर्जन र चट्याङ्ग सहित मध्यमसम्मको वर्षा र हिमपातको सम्भावना छ।

बागमती, गण्डकी, लुम्बिनी र सुदूरपश्चिम प्रदेशका तराई भूभागका केही स्थानमा, मधेश प्रदेशका साथै कोशी प्रदेशका तराई भूभागका थोरै स्थानमा मेघगर्जन र चट्याङ्ग सहित मध्यमसम्मको वर्षाको सम्भावना रहेको महाशाखाले जनाएको छ।

राति कोशी, बागमती र गण्डकी प्रदेशको हिमाली भूभगको केही स्थान तथा लुम्बिनी, कर्णाली र सुदूरपश्चिम प्रदेशका हिमाली भूभागका थोरै स्थानमा मेघगर्जन र चट्याङ्ग सहित मध्यमसम्मको वर्षा र हिमपातको सम्भावना छ।

कोशी, बागमती, गण्डकी र लुम्बिनी प्रदेशको पहाडी भूभागको धेरै स्थान तथा कर्णाली र सुदूरपश्चिम प्रदेशका पहाडी भूभागका केही स्थानमा मध्यमसम्मको वर्षाको सम्भावना छ।

तराई भूभागका धेरै स्थानमा मेघगर्जनरचट्याङ्ग सहित मध्यमसम्मको वर्षाको सम्भावना रहेको महाशाखाले जनाएको छ।

राति नै कोशी, बागमती, गण्डकी र लुम्बिनी प्रदेशको पहाडी भूभागको थोरै स्थानमा तथा कर्णाली र सुदूरपश्चिम प्रदेशका पहाडी भू(भागका एक दुई स्थानमा भारी देखि धेरै भारी वर्षाको सम्भावना रहेको छ।

साथै मधेश प्रदेशका तथा बागमती, गण्डकी, लुम्बिनी र सुदूरपश्चिम प्रदेशका तराई भूभागका एकदुई स्थानमा समेत भारी देखि धेरै भारी वर्षाको सम्भावना रहेको छ ।