काठमाडौं-राष्ट्रिय स्वतन्त्र पार्टी (रास्वपा) का सभापति रवि लामिछानेले मकवानपुरको भीमफेदीमा भएको सवारी दुर्घटनाप्रति दुःख व्यक्त गरेका छन्। छठ पर्व मनाउन घर फर्किने क्रममा भएको दुर्घटनामा ६ जनाले ज्यान गुमाउनुपरेको घटनाले आफू स्तब्ध भएको उनले बताएका छन्।

सामाजिक सञ्जालमार्फत शोक वक्तव्य जारी गर्दै लामिछानेले दुर्घटनामा ज्यान गुमाउनेहरूप्रति श्रद्धाञ्जली अर्पण गरेका छन्। उनले शोकसन्तप्त परिवारजनप्रति गहिरो समवेदना व्यक्त गर्दै घाइतेहरूको शीघ्र स्वास्थ्यलाभको कामना पनि गरेका छन्।

लामिछानेले दुर्घटनामा घाइते भएकाहरूको सम्पूर्ण उपचार निःशुल्क गर्न तथा मृतकका परिवारलाई तत्काल उचित राहत र क्षतिपूर्ति उपलब्ध गराउन सरकार र सम्बन्धित निकायसँग माग गरेका छन्।