काठमाडौं-सरकारले सहसचिव इन्दु घिमिरेलाई सचिवमा बढुवा गर्दै रक्षा मन्त्रालयको सचिवको जिम्मेवारी दिएको छ।

शुक्रबार सिंहदरबारमा बसेको मन्त्रिपरिषद् बैठकले घिमिरेलाई नेपाल सरकारको विशिष्ट श्रेणी (सचिव) मा बढुवा गरी रक्षा मन्त्रालयमा पदस्थापन गर्ने निर्णय गरेको हो ।

बढुवा सिफारिस समितिले घिमिरेलाई सचिव पदका लागि पहिलो नम्बरमा सिफारिस गरेको थियो । सोही सिफारिसका आधारमा मन्त्रिपरिषद्ले उनलाई सचिवमा नियुक्त गरेको हो । सचिवमा बढुवा हुनुअघि उनी संस्कृति, पर्यटन तथा नागरिक उड्डयन मन्त्रालयमा सहसचिवका रूपमा कार्यरत थिइन् ।

यसअघि रक्षा मन्त्रालयका सचिव रहेका केदारनाथ शर्मालाई गृह मन्त्रालयको सचिवमा सरुवा गरिएपछि उक्त पद रिक्त भएको थियो । रिक्त रहेको रक्षा मन्त्रालयको नेतृत्व अब घिमिरेले सम्हाल्ने भएकी छन् ।

घिमिरे सचिव पदमा बढुवा हुने केही महिला प्रशासनिक अधिकृतमध्ये एक हुन् । उनको नियुक्तिसँगै रक्षा मन्त्रालयले नयाँ प्रशासनिक नेतृत्व पाएको छ ।