दमक-दमक इन्डस्ट्रियल पार्कसम्बन्धी मुद्दामा सर्वोच्च अदालतबाट पार्कको पक्षमा फैसला आएको भन्दै परियोजनाका समर्थकहरूले स्वागत गरेका छन्। उनीहरूले फैसलापछि परियोजनाको प्रभावकारी कार्यान्वयनमा जोड दिँदै औद्योगीकरण, रोजगारी सिर्जना र उत्पादन वृद्धि गर्ने लक्ष्य पूरा गर्न सबै पक्षको सहकार्य आवश्यक रहेको बताएका छन्।

समर्थकहरूका अनुसार दमक इन्डस्ट्रियल पार्क औद्योगिक संरचना निर्माणमा मात्र सीमित नभई कृषि, उद्योग, प्रविधि, लगानी र बजारलाई एकीकृत गर्ने दीर्घकालीन परियोजना हो। यसको कार्यान्वयनबाट स्थानीय उत्पादनले बजार पाउने, स्वदेशी उद्योगको विकास हुने र युवाका लागि देशभित्रै रोजगारीका अवसर सिर्जना हुने अपेक्षा गरिएको छ।

परियोजनाको मुआब्जालगायतका विषयलाई लिएर विगतमा विवाद र कानुनी चुनौती उत्पन्न भएका थिए। ती विषयमा उठेका प्रश्न र असहमतिलाई कानुनी प्रक्रियामार्फत निरूपण गर्ने प्रयास भएको समर्थकहरूको भनाइ छ। उनीहरूले सर्वोच्च अदालतको फैसलालाई कानुनी प्रक्रियाको सम्मान गर्दै परियोजना अघि बढाउने अवसरका रूपमा लिएका छन्।

समर्थकहरूले विकाससम्बन्धी निर्णय तथ्य, प्रमाण, कानुनी प्रक्रिया र सार्वजनिक हितका आधारमा हुनुपर्नेमा जोड दिएका छन्। लोकतान्त्रिक व्यवस्थामा प्रश्न उठाउने, असहमति राख्ने र न्याय खोज्ने अधिकार सबैलाई रहेको उल्लेख गर्दै उनीहरूले परियोजनाप्रति आशंका राख्ने पक्षसँग पनि संवाद र सहकार्य गरेर अघि बढ्न आग्रह गरेका छन्।

दमक इन्डस्ट्रियल पार्कको प्रभावकारी कार्यान्वयन भए कृषि र उद्योगबीचको सम्बन्ध विस्तार हुनुका साथै उत्पादनमूलक क्षेत्रमा लगानी बढ्ने अपेक्षा गरिएको छ। कृषि आधुनिकीकरण, नयाँ सीप तथा प्रविधिको विकास, स्वदेशी उत्पादनको क्षमता अभिवृद्धि र निर्यात प्रवर्द्धनमा परियोजनाले योगदान पुर्‍याउन सक्ने समर्थकहरूको धारणा छ।

उनीहरूले परियोजनाको सफलताका लागि पारदर्शिता, जवाफदेहिता र स्थानीय जनताको हितलाई प्राथमिकतामा राख्नुपर्ने बताएका छन्। विकासलाई कसैको व्यक्तिगत जित वा हारका रूपमा नभई स्थानीय जनताले पाउने लाभ, किसानका उत्पादनले प्राप्त गर्ने बजार र युवाले पाउने रोजगारीका आधारमा मूल्याङ्कन गर्नुपर्ने उनीहरूको भनाइ छ।

परियोजनाको अवधारणा तथा कार्यान्वयनमा सहयोग पुर्‍याउने स्थानीय जनता, जनप्रतिनिधि, बुद्धिजीवी, समाजसेवी, सरकारी निकाय, राष्ट्रसेवक कर्मचारी र अन्य सरोकारवालाप्रति पनि समर्थकहरूले आभार व्यक्त गरेका छन्।

अब परियोजनालाई योजनाबाट परिणाममा रूपान्तरण गर्न सम्बन्धित निकायले आवश्यक प्रक्रिया अघि बढाउनुपर्नेमा उनीहरूले जोड दिएका छन्।