काठमाडौं-प्रहरी महानिरीक्षक (आईजीपी) दानबहादुर कार्कीले आकस्मिक रूपमा बोलाएको प्रहरीको पोलिसी कोअर्डिनेसन कमिटी (पीसीसी) बैठक चार घण्टापछि सकिएको छ।

बिहीबार दिउँसो ३ बजेदेखि नक्सालस्थित प्रहरी प्रधान कार्यालयमा सुरु भएको बैठक चार घण्टापछि सम्पन्न भएको हो। बैठकमा आठ जना अतिरिक्त प्रहरी महानिरीक्षक (एआईजी), सातै प्रदेशका प्रहरी नायब महानिरीक्षक (डीआईजी) तथा काठमाडौं उपत्यकामा कार्यरत प्रहरी वरिष्ठ उपरीक्षक (एसएसपी) सहभागी थिए।

आईजीपी कार्कीलाई सरकारले पदबाट हटाउने तयारी गरेको भन्ने विवरण सार्वजनिक भइरहेका बेला उनले समसामयिक विषयमा छलफल गर्न बैठक बोलाएको बताइएको छ। बैठकमा समसामयिक विषयमा छलफल भएको सहभागी एक उच्च प्रहरी अधिकृतलाई उद्धृत गर्दै रातोपाटीले जनाएको छ।

सरकारले आईजीपी कार्कीलाई हटाउन खोजेको भनिएको विषयमा भने आधिकारिक रूपमा स्पष्ट विवरण सार्वजनिक भएको छैन। यसअघि प्रतिनिधिसभाको सार्वजनिक लेखा समितिमा निर्वाचन प्रहरीका लागि खरिद गरिएको पोसाकमा अनियमितता भएको भन्दै प्रश्न उठेको थियो। उक्त विषयमा समितिले उपसमिति गठन गरी छानबिन गरिरहेको छ। उपसमितिले हालसम्म प्रतिवेदन बुझाएको छैन।

निर्वाचन प्रहरीलाई पोसाकबापत हिमाली जिल्लामा प्रतिव्यक्ति ८ हजार रुपैयाँ, पहाडी जिल्लामा ७ हजार रुपैयाँ र तराईका जिल्लामा ६ हजार रुपैयाँ उपलब्ध गराइएको थियो। पोसाक खरिद तथा वितरणसम्बन्धी विषयमा उठेका प्रश्न र आईजीपीलाई हटाउने चर्चाबीच प्रहरी प्रधान कार्यालयमा भएको बैठकलाई चासोका साथ हेरिएको छ।

यद्यपि, बैठकमा निर्वाचन प्रहरीको पोसाक खरिद प्रकरण वा आईजीपीको पदसम्बन्धी विषयमा नै छलफल भएको हो भन्ने आधिकारिक पुष्टि भएको छैन।