काठमाडौं – नेकपा एमालेका वरिष्ठ उपाध्यक्ष ईश्वर पोखरेलले सामाजिक काममा सक्रिय युवाहरुलाई पार्टीले प्रोत्साहन गर्ने प्रतिवद्धता जनाउनु भएको छ ।
राष्ट्रिय युवा संघ नेपाल काठमाडौं महानगर कमिटी क्षेत्र नम्बर ५ ले महाराजगञ्जमा आयोजना गरेको रक्तदान कार्यक्रममा पूर्वउपप्रधानमन्त्री समेत रहेका उपाध्यक्ष पोखरेलले परोपकारमा युवाको सक्रियता प्रशंसनीय काम भएको बताउनु भयो ।
वरिष्ठ उपाध्यक्ष पोखरेलले भन्नुभयो, ‘राजनीति गर्नु पनि देश र जनताको हितकै लागि हो । समाजसेवा पनि नागरिकको हितकै लागि हुन्छ । युवाहरु यस्तो काममा प्रेरित हुनुपर्छ ।’
अस्पतालहरुमा रगत अभाव भइरहेका बेला रगत संकलन गरिएकाले यसको खास महत्त्व रहेको पोखरेलको भनाइ थियो । नेता पोखरेलले आगामी दिनमा पनि यस्ता कार्यक्रमलाई निरन्तरता दिन युवाहरुलाई आग्रह गर्नु भयो ।
कार्यक्रममा १५० जनाले रक्तदान गरेको राष्ट्रिय युवा संघ नेपाल काठमाडौं महानगरका अध्यक्ष प्रवीण श्रेष्ठले जानकारी दिनु भयो।
प्रतिक्रिया