काठमाडौं-भौतिक पूर्वाधार तथा यातायात मन्त्री देवेन्द्र दाहालले निराशाको खेती गर्नेहरुलाई जवाफ दिने बेला आएको बताउनु भएको छ। नाडा अटो मोवाईल्स डीलर एशोसिएसन नाडाले मंगलबार ललितपुरमा गरेको नाडा अटो डाइलगको समापन समारोहमा उहाँले पूर्वाधार विकास, रोजगारी अभिवृद्धी, स्वरोजगारी सिर्जना जस्ता क्षेत्रमा उल्लेख्य प्रगती भए पनि केहि भएन र हुँदैन भनेर निराशा छर्ने प्रयास हुने गरेको पनि बताउनुभयो।

पूर्वाधारका साथै शिक्षा, स्वास्थ्य, सञ्चार, विद्युतीकरण लगायतका क्षेत्रमा नेपालमा फड्को मारि रहेको पनि उहाँको भनाई छ। अटोमोवाईल्स समेत नेपालको आर्थिक विकासको सहयोगी रहेको भन्दै मन्त्री दाहालले अटोमोवाईल्सको उपयोगबाट कृषि उपजको बजारीकरण, स्वरोजगारी अभिवृद्धी तथा गाउँ र सहर जोडिने कार्य प्रभावकारी हुँदै गएको बताउनुभयो । वातावरणमैत्री सवारीसाधन र जनमूखी सडक सञ्जाललाई प्राथमिकता दिन आवश्यक रहेको भन्दै उहाँले सरकारले समेत यि विषयलाई प्राथमिकतामा राखेको बताउनुभयो।

कार्यक्रममा मन्त्रालयका सचिव केशवकुमार शर्माले प्रदेश सरकारको समेत समन्वयमा यातायात क्षेत्र व्यवस्थित पार्ने काम भई रहेको बताउनुभयो । संविधानले दिएको यातायात व्यवस्थापन सम्वन्धि अधिकारको उपयोग प्रदेश तहबाट हुन थाले पछि नीतिगत र समन्वयात्मक कार्य संघीय सरकार मार्फत हुने बताउनुभयो। कार्यक्रममा विभिन्न चरणमा विभिन्न विषयमा अन्तरक्रिया समेत भएको कार्यक्रम संयोजक यमुना श्रेष्ठले बताउनुभयो।

नाडाका अध्यक्ष करण चौधरीका अनुसार कार्यक्रममा अटोमोवाईल्स क्षेत्रका विज्ञ एवम् सरकारी अधिकारीहरुले यातायात एवम् अटोमोवाईल्सका विषयमा आ आफ्ना धारणा राखेका थिए ।