काठमाडौं-पूर्वमन्त्री एवं प्रगतिशील लोकतान्त्रिक पार्टी (प्रलोपा) नेता सुदन किरातीले पार्टी परित्याग गरेको घोषणा गरेका छन्।

अध्यक्ष परिषद् सदस्यबाट केही समयअघि नै राजीनामा दिएका  बुधबार सामाजिक सञ्जालमार्फत किरातीले प्रलोपाको अब साधारण सदस्यसमेत नरहने निर्णय सार्वजनिक गरेका हुन्।

सामाजिक सञ्जालमार्फत आफ्नो धारणा सार्वजनिक गर्दै किरातीले करिब पाँच महिनाको राजनीतिक यात्रापछि पार्टी छाड्ने निष्कर्षमा पुगेको बताएका छन्।

किरातीले यस अवधिमा मार्गदर्शन गर्ने नेताहरू, सहकार्य गर्ने साथीहरू र कर्मचारीहरूप्रति हार्दिक धन्यवाद व्यक्त गरेका छन्। पार्टी परित्याग गरे पनि राजनीतिबाट भने उनी टाढा नहुने उनको भनाइ छ।

यो अवधिमा आफूलाई सहयोग गर्ने सबैलाई उनले धन्यवाद दिएका छन्। किरातीले भनेका छन्, ‘करिब ५ महिनाको यस यात्रामा मार्गदर्शन गर्नुहुने आदरणीय नेताहरू, हातेमालो गर्ने सम्पूर्ण साथीहरू तथा कर्मचारीहरूप्रति हार्दिक धन्यवाद व्यक्त गर्दछु।’

प्रलोपासँगको सम्बन्ध अन्त्य भएपछि नेता तथा कार्यकर्तासँगको व्यक्तिगत सम्बन्ध यथावत राख्ने जनाएका छन्। ‘यस अवधिमा प्राप्त अनुभवहरूलाई मैले अमूल्य सम्पत्तिको रूपमा आत्मसाथ गरेको छु। संगठनसँगको औपचारिक सम्बन्ध अन्त्य भएपनि आगामी दिनहरूमा आपसी सम्मान, सद्भाव र मित्रवत सम्बन्ध यथावत् रहने विश्वास लिएको छु,’ किरातीले भनेका छन्। 

प्रलोपा त्यागेपछि राजनीति भने जारी राख्ने उनले जनाएका छन्। अबको बाटो सजिलो नभए पनि जनताको सेवामा लागिराख्ने उनले वाचा गरेका छन्। 

‘जनसमुदायको भरोसा र सहिदको अधुरो सपनालाई मुटुमा बोकेर जस्तोसुकै परिस्थिति आएपनि देश र जनताको सेवा, समर्पण र समाज रूपान्तरणको यात्राबाट पछि नहट्ने वाचा गर्दछु,’ किरातीले लेखेका छन्, ‘मेरो लागि आगामी बाटो सजिलो नहुन सक्छ तर जनताको विश्वास र सहिदको बलिदानले देखाएको मार्गमा निरन्तर अघि बढिरहने छु।’