रसुवा- भोटेकोशी नदीमा एक्कासी आएको बाढीले रसुवामा चार प्रहरी कार्यालय बगाएको छ। ती कार्यालयमा कार्यरत सबै प्रहरी सम्पर्कविहीन रहेको प्रहरी प्रधान कार्यालयले जनाएको छ।

बाढीले इप्रका टिमुरे, रसुवागढी, प्रहरी चौकी स्याफ्रुबेंशी र मेलुङ बगाएको छ । टिमुरमा कार्यरत १६ जना, स्याफ्रुबेंशीका नौ जना, रसुवागढीका नौ जना र मेलुङका ६ जना प्रहरी सम्पर्कविहीन छन् ।

त्यस्तै, सशस्त्र प्रहरीका पनि टिमुरे बिओपीका नौ कर्मचारी सम्पर्कविहीन रहेको सशस्त्र प्रहरी प्रधान कार्यालयले जनाएको छ । चीनतर्फबाटै त्रिशुली नदीमा एक्कासी बाढी आएको हो । हिमताल फुटेर बाढी आएको आशंका गरिएको छ। बाढीले नुवाकोटमा पनि ठूलो क्षति गरेको छ।