आज ग्लोबल आइएमई बैंकको २०औँ वार्षिक साधारण सभा सम्पन्न भएको छ। एउटा संस्थाको वार्षिक साधारण सभा केवल हिसाब–किताबको समीक्षा गर्ने अवसर मात्र होइन, विगतको यात्रा सम्झने, वर्तमानको मूल्याङ्कन गर्ने र भविष्यको बाटो तय गर्ने महत्वपूर्ण क्षण पनि हो। त्यसैले आजको दिन मेरा लागि विशेष गर्व र भावुकताको दिन बनेको छ।

दुई दशकअघि आइएमई रेमिट अर्थात् रेमिट्यान्सलाई आधार बनाएर सुरु भएको यात्रा आज ग्लोबल आइएमई बैंकका रूपमा मुलुकका सबै ७७ जिल्लासम्म पुगेको छ। त्यो समयको सानो सपना आज लाखौँ नेपालीको दैनिक बैंकिङ जीवनसँग जोडिएको छ। आज ५९ लाख ग्राहकले हामीमाथि विश्वास गर्नुभएको छ। हाम्रा लागि यो संख्या केवल ग्राहकको संख्या होइन, वर्षौँदेखि निर्माण हुँदै आएको विश्वासको प्रतिबिम्ब हो।

नेपालमा मात्र होइन, हाम्रो यात्रा विश्वका विभिन्न मुलुकसम्म फैलिएको छ। अमेरिका, बेलायत, अस्ट्रेलिया, मलेसिया, दक्षिण कोरिया, जापान, साउदी अरब, कतार, संयुक्त अरब इमिरेट्स र भारतलगायतका देशबाट हाम्रै सञ्जालमार्फत रेमिट्यान्स नेपाल भित्रिरहेको छ।

विदेशमा नेपाली दाजुभाइ तथा दिदीबहिनीले बगाएको पसिनाको कमाइ जब सुरक्षित र वैधानिक माध्यमबाट नेपाल भित्रिन्छ, त्यसले एउटा परिवारको आवश्यकता पूरा गर्नुका साथै समग्र मुलुकको अर्थतन्त्रलाई चलायमान बनाउँछ। उहाँहरूको मेहनत र योगदानसँग जोडिन पाउनु हाम्रा लागि व्यावसायिक अवसरभन्दा पनि ठूलो जिम्मेवारी र सौभाग्य हो।

विदेशमा रहनुभएका गैरआवासीय नेपालीहरूको माया, विश्वास र साथप्रति म विशेष आभारी छु। उहाँहरूका लागि हामीले छुट्टै वैदेशिक तथा गैरआवासीय बैंकिङ विभाग स्थापना गरेका छौँ। विदेशमा रहेर पनि नेपालमा रहेका आफ्नो बैंकिङ सेवासँग सहज रूपमा जोडिन सकियोस् भन्ने उद्देश्यले चौबीसै घण्टा सेवा उपलब्ध गराउने व्यवस्था गरेका छौँ।

विश्वास नै हाम्रो सबैभन्दा ठूलो पुँजी

ग्लोबल आइएमई बैंकको यात्रामा शेयरधनीहरूको विश्वासको आफ्नै विशेष स्थान छ। शेयरधनीहरूको निरन्तर साथ र भरोसाले नै हामीलाई अघि बढ्ने ऊर्जा दिएको छ।

यस वर्ष बैंकले ६ अर्ब ४ करोड रुपैयाँ खुद नाफा आर्जन गरेको छ। आजको साधारण सभाले १० प्रतिशत लाभांश वितरण गर्ने प्रस्ताव सर्वसम्मत रूपमा पारित गरेको छ। स्थापनादेखि हालसम्म बोनस शेयर र नगद लाभांश गरी कुल २४६ प्रतिशत लाभांश वितरण गर्न सक्नु हाम्रा शेयरधनीहरूको विश्वास र संस्थागत यात्राको एउटा महत्वपूर्ण उपलब्धि हो।

तर उपलब्धिसँगै जिम्मेवारी पनि बढ्छ। बैंक ठूलो हुँदै जाँदा त्यसप्रतिको विश्वास र अपेक्षा पनि त्यत्तिकै ठूलो हुन्छ। त्यसैले हाम्रो प्राथमिकता नाफा र व्यवसाय विस्तारमा मात्र सीमित छैन। बैंकलाई अझ सुरक्षित, पारदर्शी, भरपर्दो र ग्राहककेन्द्रित बनाउनु हाम्रो निरन्तर प्रतिबद्धता हो।

नियामक निकायको मार्गदर्शन र अन्तर्राष्ट्रिय यात्राको लक्ष्य

नेपाल सरकार र नेपाल राष्ट्र बैंकप्रति म हार्दिक कृतज्ञता व्यक्त गर्दछु। नीति, निर्देशन र मार्गदर्शनले नेपालको बैंकिङ क्षेत्रलाई सुरक्षित र व्यवस्थित रूपमा अघि बढाउन महत्वपूर्ण भूमिका खेलेको छ।

हामी नियामक निकायका नीति, निर्देशन तथा मापदण्डको पूर्ण पालना गर्दै बैंकलाई थप सबल र विश्वसनीय बनाउने प्रतिबद्धतामा दृढ छौँ।

अब हाम्रो लक्ष्य नेपालको सीमाभन्दा बाहिर बैंकिङ सेवाको पहुँच विस्तार गर्नु पनि हो। नेपाल सरकार र नेपाल राष्ट्र बैंकबाट आवश्यक साथ, सहयोग र सहजीकरण प्राप्त भएमा विदेशमा शाखा खोल्ने पहिलो नेपाली बैंक बन्ने लक्ष्यका साथ हामी अघि बढिरहेका छौँ। यो केवल एउटा बैंकको अन्तर्राष्ट्रिय विस्तारको विषय होइन; नेपाली बैंकिङ क्षेत्रको क्षमता र पहिचानलाई विश्वमाझ स्थापित गर्ने अवसर पनि हो।

ग्राहक र कर्मचारी : यात्राका वास्तविक साझेदार

ग्लोबल आइएमई बैंकको यात्रामा ग्राहकहरू सबैभन्दा महत्वपूर्ण साझेदार हुनुहुन्छ। उहाँहरूको विश्वासले नै हामीलाई हरेक दिन अझ राम्रो सेवा दिन प्रेरित गरेको छ।

ग्राहकको आवश्यकता र अपेक्षा परिवर्तन हुँदै गएको छ। त्यसैले बैंकिङ सेवा पनि समयअनुकूल परिवर्तन हुनुपर्छ। अब ग्राहकले बैंकको शाखामा पुगेर मात्र सेवा लिनुपर्ने अवस्था विस्तारै बदलिँदैछ। प्रविधिले बैंकिङलाई ग्राहकको हातमै पुर्‍याएको छ।

यस परिवर्तनलाई आत्मसात् गर्दै आगामी दिनमा डिजिटल बैंकिङमा थप लगानी गर्ने हाम्रो योजना छ। ग्राहकलाई अझ सहज, छिटो, सुरक्षित र आधुनिक सेवा उपलब्ध गराउनु हाम्रो प्राथमिकता हुनेछ।

यस यात्राका अर्का महत्वपूर्ण आधार हाम्रा कर्मचारी साथीहरू हुनुहुन्छ। सञ्चालक समिति, व्यवस्थापनदेखि हरेक तहमा कार्यरत कर्मचारीको मेहनत, इमानदारी र समर्पण नै बैंकको सबैभन्दा ठूलो शक्ति हो। संस्थाको भवन, प्रविधि र पूँजी महत्वपूर्ण हुन्छन्, तर ती सबैलाई परिणाममा बदल्ने शक्ति समर्पित जनशक्तिमा हुन्छ।

त्यसैले ग्लोबल आइएमई बैंकको आजको उपलब्धिमा योगदान पुर्‍याउने प्रत्येक कर्मचारीप्रति म हार्दिक धन्यवाद व्यक्त गर्दछु।

संकटमा समाजसँगै उभिनु हाम्रो दायित्व

व्यवसाय र बैंकिङ सेवासँगै हाम्रो सामाजिक दायित्व पनि उत्तिकै महत्वपूर्ण छ।

गत महिना भोटेकोशी र त्रिशूली नदी तथा गत हप्ता गण्डकी नदी र यसका सहायक नदीमा आएको बाढीले मुलुकका विभिन्न स्थानमा ठूलो क्षति पुर्‍याएको छ। बाढी, पहिरो लगायतका प्राकृतिक प्रकोपमा परी ज्यान गुमाउनुहुने सबैप्रति म हार्दिक श्रद्धाञ्जली व्यक्त गर्दछु। प्रभावित परिवार तथा पीडित दाजुभाइ–दिदीबहिनीप्रति हार्दिक समवेदना व्यक्त गर्दछु।

यस्तो संकटको घडीमा समाजसँगै उभिनु हाम्रो दायित्व हो। यही भावनाका साथ बैंक परिवारले कर्मचारीहरूको एक दिनको तलबसहित ५ करोड ७५ लाख ९२ हजार रुपैयाँ प्रधानमन्त्री दैवी प्रकोप उद्धार कोषमा हस्तान्तरण गरेको छ।

यो सहयोगमा सहभागी सम्पूर्ण कर्मचारी साथीहरूलाई म धन्यवाद दिन चाहन्छु। विपत्तिको समयमा पीडितको साथमा उभिनु केवल सामाजिक उत्तरदायित्व होइन, मानवीय कर्तव्य पनि हो भन्ने हाम्रो विश्वास छ।

अब अर्को दशकको यात्रा

दुई दशकको यात्रा पूरा गर्दै गर्दा स्वाभाविक रूपमा विगत सम्झिन्छु। सुरुका दिनका चुनौती सम्झिन्छु। सानो सपना बोकेर अघि बढेको समय सम्झिन्छु। त्यसपछि आएका अवसर, चुनौती, परिवर्तन र उपलब्धिहरू सम्झिन्छु।

आज पछाडि फर्केर हेर्दा एउटा कुरा स्पष्ट देखिन्छ- विश्वास निर्माण गर्न वर्षौँ लाग्छ, तर त्यसलाई जोगाइराख्न हरेक दिन इमानदार प्रयास गर्नुपर्छ।

ग्लोबल आइएमई बैंकले यही विश्वासलाई आफ्नो यात्राको केन्द्रमा राखेको छ।

अब हामी अर्को दशकतर्फ अघि बढिरहेका छौँ। यो दशक प्रविधि, नवप्रवर्तन, डिजिटल बैंकिङ, अन्तर्राष्ट्रिय विस्तार र अझ बलियो ग्राहक सम्बन्धको दशक हुनेछ। हामी बदलिँदो समयसँगै आफूलाई परिवर्तन गर्दै ग्राहकको आवश्यकता र देशको आर्थिक विकाससँग जोडिँदै अघि बढ्नेछौँ।

ग्लोबल आइएमई बैंकको यात्रा कसैको एक्लो यात्रा होइन। यो हाम्रा शेयरधनी, ग्राहक, कर्मचारी, नेपाल सरकार, नेपाल राष्ट्र बैंक, संस्थागत लगानीकर्ता, सञ्चारकर्मी, शुभेच्छुक तथा सम्पूर्ण सरोकारवालाको साझा यात्रा हो।

दुई दशकअघि एउटा सानो सपनाबाट सुरु भएको यात्रा आज लाखौँ नेपालीको विश्वाससँग जोडिएको छ। अब हाम्रो जिम्मेवारी त्यो विश्वासलाई अझ बलियो बनाउँदै नयाँ उचाइतर्फ अघि बढ्नु हो।

हामीले दुई दशकमा एउटा संस्था निर्माण गरेका छौँ। अबको दशकमा अझ बलियो विश्वास, अझ आधुनिक सेवा र अझ व्यापक पहुँचसहित एउटा अझ सबल वित्तीय भविष्य निर्माण गर्ने लक्ष्यका साथ अघि बढ्नेछौँ।

यो यात्रा यहाँसम्म पुर्‍याउनुहुने सबैप्रति हृदयदेखि नै आभार।

अध्यक्ष, ग्लोबल आइएमई बैंक लिमिटेड