काठमाडौं-सरकारले एशिायाली विकास बैंक (एडीबी)बाट ऋण लिनका लागि सम्झौताका विषयमा छलफल गर्न वार्ता टोली गठन गरेको छ। 

वैशाख १० गते बिहीबार सिंहदरबारस्थित प्रधानमन्त्री तथा मन्त्रिपरिषद्को कार्यालयमा बसेको मन्त्रिपरिषद् बैठकले अर्थ मन्त्रालयका सहसचिवको नेतृत्वमा वार्ता टोली गठन गरेको सरकारका प्रवक्ता एवं शिक्षामन्त्री सस्मित पोखरेलले जानकारी दिए। सरकारले एकीकृत खानेपानी आपूर्ति तथा ढल व्यवस्थापन परियोजनाका लागि एसियाली विकास बैंकबाट ऋण लिन लागेको छ। 

यस परियोजनाका लागि एडीबीले ११५ मिलियन अमेरिकी डलर सहुलियतपूर्ण ऋण सहायता गर्न लागेको छ। यससम्बन्धी वित्तीय सम्झौता तथा अन्य सम्बन्धित दस्ताबेजलाई अन्तिम रूप दिने विषयमा वार्ता गर्न मन्त्रिपरिषद्ले वार्ता टोली गठन गर्ने निर्णय गरेको हो।