काठमाडौं-त्रिभुवन विश्वविद्यालयका उपकुलपतिसहित तीन जनाले सामूहिक राजीनामा दिएका छन् ।

आज उपकुलपति प्राडा दीपक अर्याल, शिक्षाध्यक्ष प्रा.डा खड्ग केसी र रजिस्ट्रार प्रा.डा केदारप्रसाद रिजालले राजीनामा दिएका हुन्।

सरकारले राजनीतिक नियुक्ति हटाउने निर्णय गरेसँगै उनीहरूले राजीनामा दिएका हुन्। नयाँ सरकारलाई काम गर्न सजिलो होस् भनेर राजीनामा दिएको उनीहरूको भनाइ छ।

अर्याल २०८२ असार २५ मा उपकुलपति नियुक्त भएका थिए। उनलाई तत्कालनी प्रधानमन्त्री केपी शर्मा ओलीले उपकुलपति नियुक्त गरेका थिए।

त्यस्तै, शिक्षाध्यक्ष केसी र रजिस्ट्रार रिजाल २०८० चैत ३० मा नियुक्त भएका थिए। उनीहरूलाई तत्कालीन प्रधानमन्त्री पुष्पकमल दाहाल ‘प्रचण्ड’ले नियुक्त गरेका थिए।

त्रिविका पदाधिकारीको कार्यकाल चार वर्षको हुन्छ। कार्यकाल बाँकी छँदै उनीहरूले राजीनामा दिएका हुन्।