सिराहा – नेकपा एमालेका अध्यक्ष केपी शर्मा ओलीले संसद्को पाँच वर्षको कार्यकाल असोज १ गतेबाट सकिएर नयाँ निर्वाचन प्रक्रिया सुरु हुने बताउनु भएको छ ।

सिराहामा आयोजित वृहत् पार्टी प्रवेश कार्यक्रमलाई शुक्रबार सम्बोधन गर्दै अध्यक्ष ओलीले प्रतिनिधि सभाको कार्यकालमा एमाले र एमालेका सांसदहरूले राष्ट्र, राष्ट्रियता, राष्ट्रिय हित र राष्ट्रिय स्वाभिमानको लागि महत्त्वपूर्ण योगदान गरेका बताउनुभयो।

एमालेको शासनकालमा महत्त्वपूर्ण र युगान्तकारी विकास निर्माणका काम भएको उहाँले बताउनुभयो । सामाजिक सुरक्षा होस् वा विपन्न जनताको हितमा होस्, एमालेले प्रभाकारी काम गरेको उहाँले बताउनुभयो। उहाँले भन्नुभयो, ‘यी सबै कुरामा नेकपा एमालेले असाधारण काम गरेको छ।’

संघ, प्रदेश र स्थानीय तह तीन वटै तहमा नेकपा एमालेका जनप्रतिनिधिले सानदार रूपमा सफलतापूर्वक काम गरेको ओलीले दाबी गर्नुभयो । उहाँले भन्नुभयो, ‘नेकपा एमालेका जनप्रतिनिधिले पाँच वर्षको कार्यकाल अन्त्यतै सफलतापूर्वक सम्पन्न गर्नुभएको छ ।’

नेकपाको एकता प्रक्रियालाई निरन्तरता दिँदै एमालेमा प्रवेश गर्ने क्रम चलेको भन्दै उहाँले एमालेमा आउने नेता कार्यकर्तालाई धन्यवाद दिनुभयो । नेकपा एमालेमा प्रवेश गर्नेलाई नेकपामा एमालेमा उचित सम्मान प्रदान गरिने उहाँले बताउनुभयो । उहाँले सबै नेता कार्यकर्तालाई मङ्सिर ४ गतेको निर्वाचनमा केन्द्रित भएर लाग्न आग्रह लाग्नुभयो ।

गठबन्धनले देशको हरेक क्षेत्रलाई ओरालो लगाउने काम गरेको उहाँले बताउनुभयो । यसलाई रोक्न मङ्सिर ४ मा गठबन्धनलाई पराजित गरेर एमालेको विजयलाई सुनिश्चित गर्नुपर्नेमा उहाँले जोड दिनुभयो ।